mércores, 25 de maio de 2016

A Xunta de Galiza ratifica a amortización de postos de traballo ocupados por persoal laboral no CGAI

O sector da Autonómica da CIG-Adminstración denuncia a destrución de emprego público e alerta das consecuencias que terá para esta institución
 
A Xunta de Galiza ratificou nunha xuntanza coas organizacións sindicais a proposta de amortización de postos de  traballo ocupados por persoal laboral no Centro Galego das Artes e a Imaxe. Ratificación que se produciu xusto un día despois de asegurar nos medios de comunicación que non faría tal.

O sector da Autonómica da CIG-Administración asegura que “non só resultan falsas as afirmacións realizadas na prensa polo goberno galego de que só se propón a amortización de prazas non ocupadas, senón que, nunha clara aposta pola destrución de emprego público, a administración galega, cunha actitude unilateral e pouco dialogante segue adiante coa súa proposta de despedimentos e amortizacións”. Unha proposta que, lembran, a CIG xa rexeitou hai un ano, e que voltou ser rexeitada de xeito unánime por todos os sindicatos presentes na xuntanza do pasado día 20 de maio.

No Centro Galego de Artes da Imaxe, a Xunta de Galiza pretende facer un recorte de máis do 40% das plazas coas que conta este centro para o desempeño das súas funcións habituais, e o que resulta aínda máis alarmante, o despedimento do 50% do persoal que actualmente -e desde hai máis de trece anos- se encarga da operación cinematográfica e audiovisual, así como da asistencia técnica da área de proxección cinematográfica, elemento vital de cara ó normal funcionamento do centro.

Lembran que o CGAI é o único centro dotado das últimas tecnoloxías en proxección técnica e cinematográfica, sendo un referente nas filmotecas nacionais e internacionais e que dá soporte ao conxunto do audiovisual galego.

De seguir adiante con este disparate, froito do  descoñecemento total e da falta de respeto da administración galega pola traballo desenvolvido, toda esta actividade quedará nas únicas mans dun só técnico especializado. Calquera persoa, aínda sen ser experta no audiovisual ou nas quendas ou labores cotiás dunha filmoteca, pódese percatar da enorme e inasumíbel carga de traballo que vai ter que soportar o único  empregado que vai ficar ao cargo das citadas funcións.

Coa amortización de gran parte dos postos de traballo que sustentan o traballo realizado ao longo destes 25 anos  de historia do CGAI, a Xunta de Galiza inicia o desmantelamento encuberto dun servizo público á cidadanía como é o dereito de acceso á cultura. “O desprecio do goberno galego pola cultura en xeral e pola memoria audiovisual colectiva de todo un pobo é indigno e reflexa a falta de autoestima dos nosos gobernantes”, denuncian.

Para a CIG-Autonómica resulta “inadmisíbel que o goberno do Sr. Feijóo, apelando a un aforro irreal con pretensións electoralistas, permita esta desfeita cultural que terá como consecuencia un dano irreversíbel á cultura e ao audiovisual galegos, ademais de supor un maior custo económico no caso daposible externalización dun servizo actualmente 100% de carácter público”.

Por iso reiteran a súa denuncia da destrucción de emprego público que se está a producir e o ataque a unha institución vital para  o noso país e que camiña cara a privatización ou,no peor dos casos, cara a súa desaparición.




Novas relacionadas:

Ningún comentario:

Publicar un comentario